Santali Wikipedia making History

ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱨᱮᱱᱟᱜ ᱱᱟᱜᱟᱢ

ᱥᱮᱭᱟᱨ ᱛᱟᱵᱳᱱ ᱯᱮ

ᱚᱼᱚᱞᱤᱡᱼ ᱢᱱ. ᱢᱟᱱᱤᱠ ᱥᱚᱨᱮᱱ

ᱛᱤᱦᱤᱧ ᱒ ᱟᱜᱚᱥᱴ ᱒᱐᱒᱐ ᱢᱟᱹᱦᱤᱛ ᱨᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱨᱮᱱᱟᱜ ᱫᱚᱥᱟᱨ ᱥᱮᱨᱢᱟ ᱯᱩᱨᱟᱹᱣ ᱢᱟᱦᱟᱸ ᱠᱟᱱᱟ᱾ ᱪᱟᱞᱟᱣ ᱮᱱ ᱒᱐᱑᱘ ᱥᱮᱨᱢᱟ ᱨᱮᱱᱟᱜ ᱛᱤᱦᱤᱧ ᱢᱟᱦᱟᱸ ᱨᱮ ᱣᱤᱠᱤᱢᱤᱰᱤᱭᱟ ᱯᱷᱟᱣᱱᱰᱮᱥᱚᱱ ᱫᱟᱨᱟᱭᱛᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱚᱯᱷᱤᱥᱤᱭᱟᱞᱤ ᱩᱪᱷᱟᱹᱱ ᱞᱮᱱᱟ᱾ ᱩᱱ ᱚᱠᱛᱚ ᱨᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱫᱚ ᱓᱐᱑ ᱜᱚᱴᱟᱝ ᱥᱤᱨᱤᱭᱟᱞ ᱨᱮ ᱛᱟᱸᱦᱮᱸᱠᱟᱱᱟ᱾ ᱟᱨ ᱱᱮᱛᱚᱜ ᱛᱤᱦᱤᱧᱟᱜ (᱐᱒ᱹ᱐᱘ᱹ᱒᱐᱒᱐) ᱦᱤᱥᱟᱹᱵ ᱞᱮᱠᱟᱛᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱑᱙᱔ ᱟᱜ ᱥᱤᱨᱤᱭᱟᱞ ᱨᱮ ᱢᱮᱱᱟᱜᱼᱟ᱾ ᱱᱮᱛᱚᱜ ᱱᱚᱣᱟ ᱣᱤᱠᱤ ᱨᱮ ᱔᱒᱕᱐ ᱜᱚᱴᱟᱝ ᱥᱟᱛᱟᱢ ᱪᱮᱛᱟᱱ ᱨᱮ ᱟᱨᱴᱤᱠᱮᱹᱞ ᱚᱞ ᱢᱮᱱᱟᱜᱼᱟ᱾ ᱔᱒ ᱡᱚᱱ ᱮᱠᱴᱤᱵᱷ ᱮᱱᱮᱢᱤᱭᱟᱹ ᱠᱚ ᱱᱚᱣᱟ ᱣᱤᱠᱤ ᱥᱟᱡᱟᱣ ᱥᱟᱯᱲᱟᱣ ᱞᱟᱹᱜᱤᱛ ᱠᱩ ᱠᱟᱹᱢᱤᱭ ᱫᱟ᱾

ᱧᱮᱞ ᱛᱟᱵᱩᱱ ᱯᱮ ᱺ ᱨᱟᱱᱤᱥᱚᱨᱟᱭ ᱯᱤᱲᱟᱜ ᱦᱩᱸᱥᱤᱭᱟ.ᱨᱤ “ᱥᱟᱱᱛᱟᱲᱤ ᱠᱚᱞᱮᱡᱽ ᱛᱷᱟᱯᱚᱱᱚᱜ ᱦᱟᱸᱥᱟ ᱪᱮᱛᱟᱱ ᱮᱴᱟᱜ ᱠᱟᱨᱵᱟᱨ ᱵᱟᱭ ᱜᱟᱱᱚᱜ-ᱟ”

ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱨᱮᱱᱟᱜ ᱱᱟᱜᱟᱢ ᱨᱮ ᱟᱭᱢᱟ ᱠᱟᱛᱷᱟ ᱜᱮ ᱞᱟᱹᱭ ᱥᱚᱫᱚᱨ ᱨᱮᱱᱟᱜ ᱢᱮᱱᱟᱜᱼᱟ᱾ ᱟᱫᱚ ᱚᱱᱟᱠᱚᱜᱮ ᱱᱟᱥᱮᱱᱟᱜ ᱠᱷᱟᱴᱚ ᱢᱟᱪᱷᱟ ᱛᱮ ᱱᱚᱸᱰᱮᱧ ᱞᱟᱹᱭ ᱥᱚᱫᱚᱨ ᱫᱟ᱾ ᱒᱐᱑᱒ ᱥᱮᱨᱢᱟ ᱥᱮᱡ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱞᱟᱹᱜᱤᱛ ᱠᱩᱨᱩᱢᱩᱴᱩ ᱮᱛᱦᱚᱵ ᱞᱮᱱᱟ᱾ ᱟᱫᱚ ᱡᱟᱸᱦᱟᱸᱭ ᱠᱚ ᱩᱱ ᱡᱚᱠᱷᱚᱡ ᱚᱱᱟ ᱠᱟᱹᱢᱤ ᱠᱩ ᱮᱛᱦᱚᱵ ᱞᱮᱫᱟᱩᱱᱠᱩ ᱠᱳᱣᱟᱜ ᱰᱷᱤᱞᱟᱹ ᱛᱮ ᱚᱱᱟ ᱠᱟᱹᱢᱤ ᱟᱨ ᱵᱟᱝ ᱞᱟᱦᱟ ᱫᱟᱲᱮᱞᱮᱱᱟ᱾ ᱤᱱᱠᱤᱣᱵᱮᱴᱚᱨ ᱨᱮᱜᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱨᱮᱱᱟᱜ ᱠᱟᱹᱢᱤ ᱫᱚ ᱩᱠᱩ ᱛᱟᱸᱦᱮᱸᱭᱱᱟ᱾

ᱧᱮᱞ ᱛᱟᱵᱩᱱ ᱯᱮ ᱺ ᱨᱟᱢ ᱢᱚᱱᱫᱤᱨ ᱵᱮᱱᱟᱣ ᱨᱮ ᱡᱟᱦᱮᱨ ᱨᱮᱱᱟᱜ ᱦᱟᱸᱥᱟ ᱵᱟᱝ ᱵᱚ ᱮᱢᱚᱜ ᱟ ᱼ ᱫᱤᱥᱚᱢ ᱯᱟᱨᱟᱱᱤᱠ

ᱤᱱᱟᱹ ᱛᱟᱭᱚᱢ ᱫᱟᱨᱟᱢ ᱒᱐᱑᱗ ᱥᱮᱨᱢᱟ ᱥᱮᱡ ᱵᱟᱝᱞᱟᱫᱮᱥ ᱠᱷᱚᱱ ᱤᱧ ᱢᱟᱱᱤᱠ ᱥᱚᱨᱮᱱ, ᱥᱟᱶᱛᱮ ᱠᱷᱳᱠᱳᱱ ᱥᱩᱭᱴᱮᱱ ᱢᱩᱨᱢᱩ, ᱥᱩᱵᱷᱟᱥ ᱪᱚᱸᱫᱨᱚ ᱦᱮᱢᱨᱚᱢ ᱟᱨ ᱥᱩᱵᱟᱥ ᱢᱩᱨᱢᱩ ᱟᱞᱮ ᱯᱩᱱ ᱦᱚᱲ ᱚᱞᱪᱤᱠᱤ ᱢᱚᱡᱽ ᱛᱮ ᱪᱮᱪᱮᱫ ᱞᱟᱹᱜᱤᱛ ᱥᱤᱧᱚᱛ ᱨᱮᱱᱟᱜ ᱳᱰᱤᱥᱟ ᱯᱚᱱᱚᱛ ᱨᱮᱱᱟᱜ ᱵᱟᱨᱤᱯᱟᱫᱟ ᱨᱮ ᱞᱟᱹᱠᱥᱢᱤᱯᱳᱥᱤ ᱨᱮ ᱞᱮ ᱥᱮᱴᱮᱨ ᱞᱮᱱᱟ ᱚᱞᱪᱤᱠᱤ ᱥᱚᱲᱠᱚ ᱨᱮ ᱥᱮᱞᱮᱫᱚᱜ ᱞᱟᱹᱜᱤᱛ᱾ ᱚᱱᱟ ᱥᱚᱲᱠᱚ ᱫᱚ ᱥᱟᱱᱛᱟᱲᱤ ᱮᱠᱟᱰᱮᱹᱢᱤ, ᱳᱰᱤᱥᱟ ᱠᱚ ᱥᱟᱯᱲᱟᱣ ᱞᱮᱫᱟ᱾ ᱮᱭᱟᱭ ᱢᱟᱦᱟᱸ ᱠᱷᱚᱱ ᱦᱚᱸ ᱡᱟᱹᱥᱛᱤ ᱜᱮ ᱚᱸᱰᱮ ᱛᱟᱸᱦᱮᱸ ᱠᱟᱛᱮ ᱚᱞᱪᱤᱠᱤ ᱥᱟᱶ ᱥᱟᱶᱛᱟ ᱨᱮᱱᱟᱜ ᱟᱭᱢᱟ ᱵᱟᱝ ᱵᱟᱰᱟᱭ ᱪᱮᱪᱮᱫ ᱠᱟᱛᱷᱚ ᱠᱩ ᱞᱮ ᱪᱤᱫ ᱠᱮᱫᱟ᱾ ᱚᱸᱰᱮᱱᱠᱩ ᱢᱟᱪᱮᱫ ᱵᱟᱞᱟᱠᱨᱟᱢ ᱵᱟᱥᱠᱮ, ᱥᱩᱱᱫᱳᱨ ᱢᱳᱦᱳᱱ ᱥᱚᱨᱮᱱ, ᱢᱟᱪᱮᱛᱟᱹᱱᱤ ᱥᱟᱨᱳ ᱢᱩᱨᱢᱩ, ᱯᱷᱟᱹᱜᱩᱱ ᱢᱮᱜᱟᱡᱤᱱ ᱨᱮᱱ ᱥᱟᱯᱲᱟᱣᱤᱡ ᱛᱟᱹᱠᱤᱱ ᱢᱟᱞᱚᱛᱤ ᱢᱩᱨᱢᱩ, ᱢᱟᱝᱜᱟᱛ ᱢᱩᱨᱢᱩ ᱥᱟᱶᱛᱮ ᱚᱥᱤᱱᱤ ᱵᱚᱱᱡᱚᱱ ᱢᱩᱨᱢᱩ, ᱵᱤᱨᱟᱢ ᱥᱚᱨᱮᱱ, ᱥᱚᱯᱱᱮᱥᱚᱨ ᱵᱟᱹᱵᱩ ᱛᱟᱹᱠᱩ ᱥᱟᱶ ᱚᱞᱪᱤᱠᱤ ᱵᱟᱫᱽ ᱠᱟᱛᱮ ᱦᱚᱸ ᱥᱟᱶᱛᱟ ᱨᱮᱱᱟᱜ ᱱᱟᱱᱟᱦᱩᱱᱟᱹᱨ ᱥᱟᱛᱟᱢ ᱪᱮᱛᱟᱱ ᱜᱟᱞᱢᱟᱨᱟᱣ ᱦᱩᱭᱩᱜ ᱠᱟᱱ ᱛᱟᱸᱦᱮᱸᱱᱟ᱾ ᱥᱟᱱᱛᱟᱲᱤ ᱟᱹᱨᱥᱤ ᱞᱟᱦᱟ ᱞᱟᱹᱜᱤᱛ ᱦᱚᱸ ᱟᱭᱢᱟ ᱜᱟᱞᱢᱟᱨᱟᱣ ᱠᱩ ᱦᱩᱭᱩᱜ ᱠᱟᱱ ᱛᱟᱸᱦᱮᱸᱱᱟ᱾ ᱟᱫᱚ ᱢᱤᱫ ᱫᱤᱱ ᱫᱚ ᱣᱤᱠᱤᱯᱤᱰᱤᱭᱟ ᱨᱮᱱᱟᱜ ᱦᱚᱸ ᱞᱮ ᱜᱟᱞᱢᱟᱨᱟᱣ ᱞᱮᱫᱟ᱾

ᱧᱮᱞ ᱛᱟᱵᱩᱱ ᱯᱮ ᱺ ᱥᱟᱱᱛᱟᱲᱤ ᱢᱤᱰᱤᱭᱥᱢ ᱠᱚᱞᱮᱡᱽ ᱨᱮᱭᱟᱜ ᱫᱟ.ᱵᱤᱛᱮ ᱥᱮᱪᱮᱫ ᱢᱩᱱᱛᱨᱤ ᱴᱷᱮᱱ ᱚᱱᱚᱞᱤᱭᱟ. ᱜᱟᱶᱛᱟ-ᱟᱜ ᱪᱤᱴᱷᱤ

ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱠᱟᱛᱮ ᱚᱱᱟ ᱫᱟᱨᱟᱭᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱦᱟ ᱨᱮᱱᱟᱜ ᱚᱱᱟ ᱜᱟᱞᱢᱟᱨᱟᱣ ᱨᱮ ᱡᱚᱛᱚ ᱦᱚᱲᱜᱮ ᱥᱟᱸᱭ ᱠᱚ ᱮᱢ ᱠᱮᱫᱟ ᱡᱮ ᱱᱚᱣᱟ ᱫᱚ ᱵᱮᱱᱟᱣ ᱟᱹᱰᱤ ᱞᱟᱹᱜᱽᱛᱤ ᱠᱟᱱᱟ᱾ ᱚᱱᱟ ᱜᱟᱞᱢᱟᱨᱟᱣ ᱞᱟᱦᱟ ᱠᱷᱚᱱ ᱜᱮ ᱯᱷᱮᱵᱨᱩᱣᱟᱨᱤ ᱪᱟᱸᱫᱚ ᱠᱷᱚᱱ ᱤᱧ ᱫᱚ ᱤᱱᱠᱤᱣᱵᱮᱴᱚᱨ ᱨᱮ ᱠᱟᱹᱢᱤ ᱫᱚᱧ ᱮᱛᱦᱚᱵ ᱞᱮᱫᱟ᱾ ᱤᱱᱟᱹ ᱜᱟᱞᱢᱟᱨᱟᱣ ᱛᱟᱭᱚᱢ ᱫᱟᱨᱟᱢ ᱥᱤᱧᱚᱛ ᱨᱮᱱ ᱥᱟᱱᱛᱟᱲ ᱠᱚ ᱦᱚᱸ ᱠᱩ ᱡᱩᱴᱟᱹᱣ ᱠᱷᱟᱹᱛᱤᱨ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱨᱮᱱᱟᱜ ᱠᱟᱹᱢᱤ ᱠᱩ ᱩᱥᱟᱹᱨᱟ ᱧᱚᱜ ᱱᱟ᱾ ᱟᱫᱚ ᱵᱟᱨᱤᱯᱟᱫᱟ ᱠᱷᱚᱱ ᱥᱚᱲᱠᱚ ᱢᱩᱪᱟᱹᱫ ᱠᱟᱛᱮ ᱜᱩᱨᱩ ᱜᱚᱢᱠᱮ ᱟᱜ ᱟᱛᱚ ᱫᱤᱥᱟᱹᱢ ᱰᱟᱸᱰᱵᱳᱥ ᱥᱮᱡ ᱛᱮ ᱵᱟᱝᱞᱟᱫᱮᱥ ᱨᱮ ᱞᱮ ᱨᱩᱣᱟᱹᱲ ᱞᱮᱱᱟ᱾ ᱜᱩᱨᱩ ᱜᱚᱢᱠᱮ ᱟᱜ ᱚᱲᱟᱜ ᱫᱟᱬᱟᱱ ᱚᱠᱛᱚᱨᱮ ᱟᱭᱟᱜ ᱛᱚᱯᱟ ᱨᱮ ᱵᱚᱸᱜᱟᱜ ᱡᱚᱠᱷᱚᱡ ᱟᱞᱮ ᱫᱟᱬᱮ ᱞᱮ ᱠᱚᱭᱡᱚᱝ ᱞᱮᱫᱟ ᱡᱮ ᱱᱚᱣᱟ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱨᱮᱱᱟᱜ ᱠᱟᱹᱢᱤ ᱡᱮᱱᱚ ᱯᱩᱨᱟᱹᱜ ᱛᱟᱞᱮ᱾

ᱧᱮᱞ ᱛᱟᱵᱩᱱ ᱯᱮ ᱺ ᱠᱮᱥᱯᱩᱨ ᱨᱮ ᱢᱤᱫ ᱦᱚᱲ ᱦᱚᱯᱚᱱ ᱪᱮᱛᱟᱱ ᱱᱟᱦᱟᱪᱟᱨ ᱵᱤᱨᱩᱫᱷ ᱯᱟᱨᱜᱟᱱᱟ ᱢᱚᱦᱚᱞᱟᱜ ᱯᱟᱨᱴᱤ ᱚᱯᱤᱥ ᱡᱟᱸᱜᱮ

ᱥᱤᱧᱚᱛ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱟᱞᱮ ᱵᱟᱝᱞᱟᱫᱮᱥ ᱥᱟᱶ ᱥᱤᱧᱚᱛ ᱨᱮᱱ ᱠᱩ ᱟᱨ ᱱᱮᱯᱟᱞ ᱨᱮᱱ ᱥᱤᱵᱩ ᱢᱩᱨᱢᱩ ᱛᱟᱹᱠᱩ ᱟᱜ ᱠᱩᱨᱩᱢᱩᱴᱩ ᱛᱮ ᱤᱱᱠᱤᱣᱵᱮᱴᱚᱨ ᱨᱮ ᱟᱭᱢᱟ ᱜᱟᱱ ᱟᱨᱴᱤᱠᱮᱹᱞ ᱞᱮ ᱚᱞ ᱠᱮᱫᱟ᱾ ᱚᱱᱟ ᱠᱩ ᱧᱮᱞ ᱠᱟᱛᱮ ᱟᱨᱦᱚᱸ ᱞᱟᱹᱠᱛᱤᱭᱟᱱ ᱚᱯᱷᱤᱥᱤᱭᱟᱞ ᱠᱟᱹᱢᱤ ᱠᱩ ᱯᱩᱨᱟᱹᱣ ᱠᱟᱛᱮ ᱒᱐᱑᱘ ᱥᱮᱨᱢᱟ ᱨᱮᱱᱟᱜ ᱒᱘ ᱡᱩᱱ ᱦᱤᱞᱟᱹᱜ ᱣᱤᱠᱤᱢᱤᱰᱤᱭᱟ ᱯᱷᱟᱣᱱᱰᱮᱥᱚᱱ ᱨᱮᱱ ᱯᱟᱹᱨᱥᱤ ᱠᱚᱢᱤᱴᱤ ᱟᱞᱮᱭᱟᱜ ᱠᱟᱹᱢᱤ ᱢᱮᱱᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱣᱤᱠᱤᱯᱤᱰᱤᱭᱟ ᱵᱮᱱᱟᱣ ᱨᱮᱱᱟᱜ ᱫᱟᱣ ᱠᱚ ᱮᱢ ᱮᱱᱟ᱾ ᱤᱱᱟᱹ ᱛᱟᱭᱚᱢ ᱳᱭᱮᱵᱽᱥᱟᱭᱤᱴ ᱵᱮᱱᱟᱣ ᱞᱟᱹᱜᱤᱛ ᱴᱮᱹᱠᱱᱤᱠᱮᱹᱞ ᱠᱟᱹᱢᱤ ᱠᱩ ᱢᱩᱪᱟᱹᱫ ᱵᱟᱲᱟ ᱠᱟᱛᱮ ᱒ ᱟᱜᱚᱥᱴ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱚᱯᱷᱤᱥᱤᱭᱟᱞᱤ ᱮᱛᱦᱚᱵ ᱮᱱᱟ᱾ ᱟᱫᱚ ᱱᱚᱣᱟ ᱠᱟᱹᱢᱤ ᱨᱮ ᱣᱤᱠᱤᱢᱤᱰᱤᱭᱟ ᱵᱟᱝᱞᱟᱫᱮᱥ ᱟᱨ ᱳᱰᱤᱭᱟ ᱣᱤᱠᱤᱯᱤᱰᱤᱭᱟ ᱨᱮᱱ ᱠᱟᱹᱢᱤᱭᱟᱹ ᱠᱩ ᱟᱜ ᱜᱚᱸᱲᱚᱸ ᱦᱚᱸ ᱟᱹᱰᱤᱜᱮ ᱛᱟᱸᱦᱮᱠᱟᱱᱟ᱾

ᱧᱮᱞ ᱛᱟᱵᱩᱱ ᱯᱮ ᱺ ᱱᱟᱜᱟᱢ ᱠᱚ ᱛᱮᱭᱟᱨ ᱠᱮᱫᱟ ᱥᱟᱬᱮᱥ ᱥᱟᱛᱟᱢ ᱟᱛᱮᱫ ᱥᱟᱱᱛᱟᱲᱤ ᱯᱟ.ᱴᱷᱣᱟ. ᱠᱚ

ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱩᱪᱷᱟᱹᱱ ᱛᱟᱭᱚᱢ ᱡᱮᱜᱮᱛ ᱡᱟᱠᱟᱛ ᱨᱮᱱ ᱟᱭᱢᱟ ᱢᱟᱹᱱᱢᱤ ᱜᱮ ᱱᱟᱣᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱠᱩ ᱪᱤᱱᱦᱟᱹᱣ ᱠᱮᱫᱟ᱾ ᱠᱚᱧᱮ ᱮᱥᱤᱭᱟ ᱨᱮᱱᱟᱜ ᱫᱤᱥᱟᱹᱢ ᱠᱩ ᱥᱟᱶ ᱤᱣᱨᱳᱯ, ᱟᱢᱮᱨᱤᱠᱟ ᱢᱟᱦᱟᱫᱮᱥ ᱨᱮᱱ ᱢᱟᱹᱱᱢᱤ ᱠᱚ ᱦᱚᱸ ᱱᱚᱣᱟ ᱠᱷᱚᱵᱚᱨ ᱠᱩ ᱧᱟᱢ ᱠᱮᱫᱟ ᱡᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱢᱮᱱᱛᱮ ᱢᱤᱫᱴᱮᱱ ᱯᱟᱹᱨᱥᱤ ᱢᱮᱱᱟᱜᱼᱟ᱾ ᱱᱚᱣᱟ ᱣᱤᱠᱤ ᱨᱮ ᱚᱞ ᱠᱷᱟᱹᱛᱤᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱱᱮᱛᱚᱜ ᱟᱵᱳᱣᱟᱜ ᱚᱞ ᱠᱩ ᱦᱚᱸ ᱤᱱᱴᱟᱨᱱᱮᱴ ᱨᱮ ᱰᱷᱤᱨ ᱪᱟᱞᱟᱜ ᱠᱟᱱᱟ ᱡᱟᱸᱦᱟᱸᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱜᱮ ᱥᱮᱬᱟᱜ ᱠᱟᱱᱟ ᱢᱮᱱᱛᱮᱧ ᱵᱩᱡᱷᱟᱹᱣ ᱫᱟ᱾ ᱫᱟᱨᱟᱭᱠᱟᱱ ᱫᱤᱱ ᱨᱮ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱥᱟᱶ ᱥᱟᱱᱛᱟᱲᱤ ᱯᱟᱹᱨᱥᱤ ᱞᱟᱦᱟ ᱤᱫᱤᱭ ᱞᱟᱹᱜᱤᱛ ᱟᱯᱮ ᱡᱚᱛᱚ ᱠᱚᱴᱷᱮᱱ ᱱᱮᱦᱚᱨ ᱡᱮ ᱟᱯᱮ ᱦᱚᱸ ᱫᱤᱱ ᱨᱮ ᱥᱮ ᱦᱟᱯᱛᱟ ᱨᱮ ᱥᱮ ᱢᱤᱫ ᱪᱟᱸᱫᱚ ᱨᱮ ᱢᱤᱫ ᱜᱷᱟᱱᱴᱟ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱨᱮ ᱚᱠᱛᱚ ᱮᱢ ᱠᱟᱛᱮ ᱟᱯᱮᱭᱟ ᱮᱱᱮᱢ ᱫᱚᱦᱚᱭ ᱯᱮ᱾ ᱟᱨ ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ ᱞᱟᱦᱟ ᱞᱟᱹᱜᱤᱛ ᱱᱤᱛ ᱫᱷᱟᱹᱵᱤᱡ ᱡᱟᱸᱦᱟᱸᱭ ᱠᱚ ᱯᱮ ᱜᱚᱸᱲᱚᱸ ᱟᱠᱟᱫ ᱞᱮᱭᱟ ᱩᱱᱠᱩ ᱠᱩ ᱤᱧᱟᱜ ᱜᱩᱱᱢᱟᱱ ᱥᱟᱨᱦᱟᱣ, ᱫᱩᱞᱟᱹᱲ ᱟᱨ ᱡᱚᱦᱟᱨᱮᱧ ᱪᱟᱞ ᱟᱯᱮ ᱠᱟᱱᱟ᱾

ᱢᱟᱱᱤᱠ ᱥᱚᱨᱮᱱ
ᱪᱟᱪᱞᱟᱣᱤᱭᱟᱹ
ᱥᱟᱱᱛᱟᱲᱤ ᱣᱤᱠᱤᱯᱤᱰᱤᱭᱟ
E-mail: wikipediasat@gmail.com
Website: https://sat.wikipedia.org/


ᱥᱮᱭᱟᱨ ᱛᱟᱵᱳᱱ ᱯᱮ
x