ᱵᱟᱝᱞᱟ ᱫᱤᱥᱚᱢ ᱨᱮ ᱯᱩᱸᱛᱷᱤ ᱜᱟᱫᱟᱱ ᱵᱮᱨᱮᱫ ᱨᱮᱱᱟᱜ ᱠᱩᱨᱩᱢᱩᱴᱩ ; ᱯᱟᱱᱛᱮ ᱧᱟᱯᱟᱢ ᱥᱟᱱᱛᱟᱲᱤ ᱯᱩᱸᱛᱷᱤ ᱱᱟᱜᱟᱢ

ᱵᱟᱝᱞᱟ ᱫᱤᱥᱚᱢ ᱨᱮ ᱯᱩᱸᱛᱷᱤ ᱜᱟᱫᱟᱱ ᱵᱮᱨᱮᱫ ᱨᱮᱱᱟᱜ ᱠᱩᱨᱩᱢᱩᱴᱩ ; ᱯᱟᱱᱛᱮ ᱧᱟᱯᱟᱢ ᱥᱟᱱᱛᱟᱲᱤ ᱯᱩᱸᱛᱷᱤ ᱱᱟᱜᱟᱢ

ᱥᱮᱭᱟᱨ ᱛᱟᱵᱳᱱ ᱯᱮ

ᱥᱤᱵᱤᱞ ᱺ ᱵᱟᱝᱞᱟ ᱫᱤᱥᱚᱢ ᱨᱮ ᱯᱩᱸᱛᱷᱤ ᱜᱟᱫᱟᱱ ᱵᱮᱱᱟᱣ ᱨᱮᱱᱟᱜ ᱠᱩᱨᱩᱢᱩᱴᱩ ᱨᱮ ᱥᱟ.ᱨᱤ ᱥᱟᱨᱱᱟ ᱜᱟᱶᱛᱟ ᱨᱮᱱ ᱥᱚᱦᱮᱫ ᱠᱚ ᱾ ᱜᱩᱨᱩ ᱜᱚᱢᱠᱮᱭᱟᱜ ᱥᱮᱪᱮᱫ ᱟᱲᱟᱝ ᱥᱩᱨ ᱥᱟᱢᱟᱝ ᱠᱟᱛᱮᱜ ᱟᱯᱱᱟᱨᱟᱜ ᱯᱟ.ᱨᱥᱤ, ᱱᱟᱜᱟᱢ ᱵᱮᱨᱮᱫ ᱠᱮᱴᱮᱡ ᱨᱮᱱᱟᱜ ᱠᱩᱨᱩᱢᱩᱴᱩ ᱨᱮ ᱠᱷᱮᱨᱣᱟᱲ ᱦᱚᱯᱚᱱ ᱾ ᱫᱷᱟ.ᱨᱛᱤ ᱟ.ᱪᱩᱨᱚᱜ ᱠᱟᱱᱟ , ᱥᱚᱥᱱᱚᱜ ᱟ.ᱨᱩᱜ ᱠᱟᱱᱟ ᱾ ᱵᱚᱫᱚᱞᱚᱜ ᱠᱟᱱ ᱛᱟᱵᱚᱱ ᱫᱤᱱᱟ.ᱢ ᱫᱤᱱ ᱦᱮᱣᱭᱟᱲ ᱨᱮᱱᱟᱜ ᱥᱤᱵᱤᱞ ᱥᱚᱲᱚᱢ ᱾ ᱚᱠᱛᱚ ᱡᱟ.ᱱᱤ ᱯᱩᱸᱛᱷᱤ ᱯᱚᱛᱚᱵᱽ ᱯᱟᱲᱦᱟᱣ ᱨᱮᱱᱟᱜ ᱦᱮᱣᱟ ᱟᱫ ᱤᱫᱤᱭ ᱫᱟᱵᱚᱱ ᱾ ᱜᱮᱭᱟᱱ ᱨᱮᱱᱟᱜ ᱢᱩᱨᱟ.ᱭ ᱟᱸᱡᱽᱞᱮ ᱟᱛᱟᱝ ᱮᱫᱟ ᱵᱚᱱ ᱰᱤᱡᱤᱴᱟᱞᱤ ᱾

ᱱᱮᱛᱟᱨ ᱫᱤᱱ ᱯᱟ.ᱨᱩᱠᱷᱤᱭᱟ. ᱠᱚ ᱫᱩᱠ ᱠᱚ ᱥᱚᱫᱚᱨᱟ ᱢᱟ.ᱱᱢᱤ ᱦᱚᱯᱚᱱ ᱯᱩᱸᱛᱷᱤ ᱥᱟᱶ ᱥᱟᱸᱜᱟᱭ ᱠᱚ ᱟᱫ ᱮᱫᱟ ᱢᱮᱱᱛᱮ ᱾ ᱢᱮᱱ ᱠᱷᱟᱱ ᱟ.ᱰᱤ ᱟᱢᱫᱟ ᱟᱱᱟᱴ ᱠᱚ ᱛᱟᱞᱟ ᱨᱮ ᱯᱩᱸᱛᱷᱤ ᱥᱟᱶ ᱥᱟᱸᱜᱟᱭ ᱡᱚᱯᱲᱟᱣ ᱨᱮᱭᱟᱜ ᱠᱩᱨᱩᱢᱩᱴᱩ ᱛᱮ ᱱᱟᱣᱟ ᱥᱟᱸᱫᱮᱥ ᱠᱚ ᱥᱚᱸᱫᱷᱟᱲ ᱮᱫᱟ ᱵᱟᱝᱞᱟ ᱫᱤᱥᱚᱢ ᱨᱮᱱ ᱠᱷᱮᱨᱣᱟᱲ ᱦᱚᱯᱚᱱ ᱾ ᱱᱚᱣᱟ ᱚᱞ ᱨᱮᱱᱟᱜ ᱥᱤᱨᱟ. ᱦᱩᱭ ᱫᱟᱲᱮ ᱠᱚᱜ ᱜᱮᱭᱟ ᱫᱤᱱᱟ.ᱢ ᱞᱮᱠᱟ ᱰᱚᱜᱚᱨ ᱥᱟᱠᱣᱟ ᱾ ᱢᱮᱱᱠᱷᱟᱱ ᱡᱮᱜᱮᱛᱤᱭᱟ. ᱨᱟᱡᱽᱟ‌.ᱨᱤ ᱥᱤᱢᱟ. ᱜᱟᱨ ᱥᱚᱞᱚᱝ ᱯᱟᱨᱚᱢ ᱠᱟᱛᱮᱫ ᱡᱟ.ᱛᱤᱭᱟ.ᱨᱤ ᱩᱯᱨᱩᱢ ᱨᱮ ᱧᱩᱛᱩᱢᱚᱜ ᱫᱚ ᱮᱠᱷᱮᱱ ᱠᱷᱚᱵᱚᱨ ᱥᱩᱢᱩᱝ ᱫᱚ ᱵᱟᱝ ᱟ; ᱚᱱᱟ ᱠᱷᱚᱱ ᱦᱚᱸ ᱢᱟᱨᱟᱝ, ᱡᱟᱸᱛᱤ ᱮᱵᱷᱮᱱᱚᱜ ᱟᱲᱟᱝ ᱠᱟᱱᱟ ᱾ ᱯᱩᱸᱛᱷᱤ ᱜᱮ ᱫᱟᱲᱮᱭᱟᱜ ᱟᱭ ᱟᱯᱱᱟᱨᱟᱜ ᱡᱟ.ᱛᱤ ᱩᱱᱩᱨᱩᱢ, ᱯᱟ.ᱨᱥᱤ ᱩᱱᱩᱨᱩᱢ, ᱱᱟᱜᱟᱢ ᱯᱟᱱᱛᱮ, ᱡᱩᱢᱤᱫ ᱦᱚᱨ ᱫᱤᱥᱟ. ᱾

ᱧᱮᱞ ᱛᱟᱵᱩᱱ ᱯᱮ ᱺ ᱵᱟᱝᱞᱟᱫᱤᱥᱚᱢ ᱨᱮ ᱚᱛ ᱦᱟᱸᱥᱟ ᱠᱚ ᱨᱮᱨᱮᱡ ᱠᱟᱱᱟ ᱤᱥᱟ.ᱭ ᱢᱤᱥᱚᱱᱟᱨᱤ; ᱫᱷᱟᱸᱫᱚᱥ ᱨᱮ ᱟ.ᱫᱤᱵᱟ.ᱥᱤᱠᱚ

ᱠᱷᱮᱨᱣᱟᱲ ᱦᱚᱯᱚᱱᱟᱜ ᱥᱟᱱᱛᱟᱲᱤ ᱯᱟ.ᱨᱥᱤ ᱛᱮ ᱯᱩᱸᱛᱷᱤ ᱯᱚᱛᱚᱵ ᱥᱟᱶ ᱥᱟ.ᱜᱟ.ᱭ ᱫᱚ ᱱᱟᱣᱟ ᱜᱮᱭᱟ ᱾ ᱪᱤᱠᱤ ᱵᱟᱝ ᱛᱮ ᱚᱞ ᱫᱚᱦᱚ ᱱᱟᱜᱟᱢ, ᱞᱟᱠᱪᱟᱨ, ᱜᱮᱭᱟᱱ ᱵᱷᱟ.ᱨᱤᱭᱟ. ᱫᱚ ᱠᱚᱢ ᱜᱮᱛᱟ ᱵᱚᱱᱟ ᱾ ᱢᱮᱱᱠᱷᱟᱱ ᱵᱤᱱᱛᱤ ᱵᱟᱠᱷᱮᱲ, ᱥᱮᱨᱮᱧ ᱫᱩᱨᱟ.ᱝ, ᱜᱟᱢ ᱠᱟ.ᱦᱱᱤ ᱨᱮ ᱡᱚᱛᱚᱱ ᱡᱚᱜᱟᱣ ᱟᱠᱟᱫ ᱱᱟᱜᱟᱢ ᱨᱮᱱᱟᱜ ᱜᱚᱱᱚᱝ ᱫᱚ ᱵᱟᱝ ᱞᱮᱠᱷᱟ ᱜᱟᱱᱚᱜ ᱞᱮᱠᱟ ᱾ ᱥᱟᱱᱛᱟᱲᱤ ᱥᱮᱨᱮᱧ ᱟᱨ ᱚᱱᱚᱬᱦᱮᱸ ᱠᱚ ᱯᱩᱭᱞᱩ ᱯᱩᱸᱛᱷᱤ ᱞᱮᱠᱟ ᱛᱮ ᱯᱟᱨᱥᱟᱞ ᱞᱮᱫᱟᱭ ᱨᱮᱵᱷᱟᱨᱮᱱᱰ ᱡᱤᱨᱤᱢᱚᱭ ᱯᱷᱤᱞᱤᱯᱥ ᱾ ᱩᱱᱤ ᱫᱚ ᱑᱘᱔᱕ ᱥᱚᱱ ᱨᱮ ᱵᱟᱝᱞᱟ ᱪᱤᱠᱤᱛᱮ ᱩᱲᱤᱥᱟ ᱡᱚᱞᱮᱥᱥᱚᱨ ᱠᱷᱚᱱ ᱚᱱᱚᱲᱦᱮᱸ ᱯᱩᱸᱛᱷᱤ ᱫᱚ ᱯᱟᱨᱥᱟᱞ ᱞᱮᱫᱟᱭ ᱾ ᱢᱤᱥᱚᱱᱟᱨᱤ ᱠᱚᱣᱟᱜ ᱚᱨᱥᱚᱝ ᱠᱷᱚᱱ ᱵᱟᱦᱮᱨ ᱨᱮ ᱛᱟᱸᱦᱮ ᱠᱟᱛᱮᱫ ᱯᱩᱭᱞᱩ ᱯᱩᱸᱛᱷᱤ ᱯᱟᱨᱥᱟᱞ ᱞᱮᱫᱟᱭ ᱱᱟᱜᱟᱢ ᱜᱩᱨᱩ ᱢᱟ.ᱡᱷᱤ ᱨᱟᱢᱫᱟᱥ ᱴᱩᱰᱩ ᱨᱟ.ᱥᱠᱟ. ᱾᱑᱘᱙᱕ ᱥᱚᱱ ᱨᱮ ᱯᱩᱭᱞᱩ ᱦᱟ.ᱴᱤᱧ ᱥᱚᱫᱚᱨ ᱥᱟᱢᱟᱝ ᱞᱮᱱᱟ ᱠᱷᱮᱨᱣᱟᱲ ᱵᱚᱝᱥᱚ ᱫᱷᱚᱨᱚᱢ ᱯᱩᱸᱛᱷᱤᱣᱟᱜ ᱾ᱵᱟᱝᱞᱟ ᱫᱤᱥᱚᱢ ᱠᱷᱚᱱ ᱯᱩᱭᱞᱩ ᱯᱩᱸᱛᱷᱤ ᱩᱪᱷᱟ.ᱱ ᱫᱚ ᱑᱙᱒᱗ ᱥᱚᱱ ᱨᱮ, ᱛᱚᱵᱮ ᱩᱱ ᱫᱚ ᱵᱷᱟᱨᱚᱛ ᱟᱨ ᱵᱟᱝᱞᱟ ᱫᱤᱥᱚᱢ ᱵᱟᱝ ᱦᱟ.ᱴᱤᱧ ᱟᱠᱟᱱᱟ ᱾ ᱵᱟᱝᱞᱟ ᱫᱤᱥᱚᱢ ᱨᱮ ᱢᱮᱱᱟᱜ ᱟᱠᱟᱫ ᱵᱚᱜᱩᱲᱟ ᱡᱤᱞᱟ. ᱨᱮᱱ ᱪᱟᱨᱩᱪᱚᱱᱫᱨᱚ ᱥᱤᱫᱩᱯ ᱥᱚᱨᱮᱱ ‘ᱵᱟᱦᱟ ᱥᱮᱨᱮᱧ ᱯᱩᱸᱛᱷᱤ’ ᱯᱟᱨᱥᱟᱞ ᱞᱮᱫᱟᱭ ᱾

ᱧᱮᱞ ᱛᱟᱵᱩᱱ ᱯᱮ ᱺ ᱯᱟᱠᱤᱥᱛᱟᱱᱤ ᱵᱤᱨᱩᱫᱷ ᱢᱤᱫ ᱠᱷᱮᱨᱣᱟᱲ ᱵᱤᱨ ᱪᱩᱲᱠᱟ. ᱢᱩᱨᱢᱩᱣᱟᱜ ᱡᱤᱣᱤ ᱟᱞᱟᱭ ᱢᱟᱦᱟ

ᱤᱱᱟ. ᱛᱟᱭᱚᱢ ᱥᱤᱫᱩᱯ ᱥᱚᱨᱮᱱ ᱜᱚᱢᱠᱮ ‘ᱜᱟᱱᱮᱨ (ᱥᱮᱨᱮᱧ) ᱯᱩᱸᱛᱷᱤ’ ᱯᱟᱨᱥᱟᱞ ᱞᱮᱫᱟᱭ ; ᱱᱤᱭᱟ. ᱵᱮᱜᱚᱨ ‘ᱵᱟᱦᱟ ᱨᱟᱥᱟ’ ᱟᱨ ‘ᱯᱩᱨᱟᱱ ᱠᱟᱦᱱᱤ’ ᱢᱮᱱᱛᱮ ᱯᱩᱸᱛᱷᱤ ᱚᱞ ᱞᱮᱫᱟᱭ, ᱢᱮᱱᱠᱷᱟᱱ ᱯᱟᱨᱥᱟᱞ ᱟᱠᱟᱱᱟ ᱥᱮ ᱵᱟᱝ ᱚᱱᱟ ᱫᱚ ᱵᱟᱝ ᱵᱟᱲᱟᱭ ᱠᱟᱱᱟ ᱾ ᱟᱯᱱᱟᱨᱟᱜ ᱪᱤᱠᱤ ᱛᱮ ᱥᱟᱱᱛᱟᱲᱤ ᱛᱮ ᱚᱞ ᱮᱛᱦᱚᱵ ᱫᱚ ᱜᱩᱨᱩ ᱜᱚᱢᱠᱮᱭᱟᱜ ᱟ.ᱭᱩᱨ ᱛᱮ ᱾ ᱑᱙᱓᱘ ᱥᱚᱱ ᱨᱮ ᱯᱚᱸᱰᱮᱛ ᱢᱩᱨᱢᱩ ᱚᱞᱪᱤᱠᱤ ᱛᱮ ᱪᱷᱟᱯᱟ ᱢᱮᱥᱤᱱ ᱮ ᱛᱮᱭᱟᱨ ᱠᱮᱫᱟᱭ ᱤᱱᱟ. ᱫᱚᱥᱟᱨ ᱥᱮᱨᱢᱟ ᱯᱷᱮᱵᱨᱩᱣᱟᱨᱤ ᱪᱟᱸᱫᱚ ᱵᱟ.ᱨᱤᱯᱟᱫᱟ ᱨᱮ ᱢᱤᱫ ᱥᱮᱱᱮᱞᱮᱫ ᱨᱮ ᱚᱱᱟ ᱪᱷᱟᱯᱟ ᱢᱮᱥᱤᱱ ᱮ ᱥᱟᱢᱟᱝ ᱥᱚᱫᱚᱨ ᱠᱮᱫᱟᱭ ᱾ ᱜᱩᱨᱩ ᱜᱚᱢᱠᱮᱭᱟᱜ ᱯᱩᱭᱞᱩ ᱩᱛᱟ.ᱨ ᱯᱟᱨᱥᱟᱞ ᱯᱩᱸᱛᱷᱤ ᱫᱚ ‘ᱦᱚᱨ ᱥᱮᱨᱮᱧ’ , ᱡᱟᱸᱦᱟ ᱫᱚ ᱑᱙᱓᱖ ᱥᱚᱱ ᱨᱮ ᱯᱨᱥᱟᱞ ᱞᱮᱱᱟ ᱾ ᱚᱞᱪᱤᱠᱤ ᱛᱮ ᱯᱩᱭᱞᱩ ᱯᱟᱨᱥᱟᱞ ᱯᱩᱸᱛᱷᱤ ᱫᱚ ‘ᱚᱞ ᱩᱯᱨᱩᱢ’ ᱡᱟᱸᱦᱟ ᱫᱚ ᱑᱙᱖᱔ ᱥᱚᱱ ᱨᱮ ᱯᱟᱨᱥᱟᱞ‌ ᱞᱮᱱᱟ ᱾ ᱱᱤᱭᱟ. ᱛᱟᱭᱚᱢ ᱟᱯᱟᱱᱟᱨᱟᱜ ᱯᱟ.ᱨᱥᱤ ᱟᱯᱱᱟᱨᱟᱜ ᱪᱤᱠᱤ ᱛᱮ ᱢᱤᱫ ᱦᱩᱞᱥᱟ.ᱭ ᱥᱟᱯᱲᱟᱣ ᱮᱱᱟ ᱫᱤᱥᱚᱢ ᱡᱟᱠᱟᱛ ᱾ ᱡᱟᱸᱦᱟ ᱨᱮᱱᱟᱜ ᱚᱨᱡᱚ ᱒᱐᱐᱓ ᱥᱚᱱ ᱨᱮ ᱯᱟ.ᱨᱥᱤ ᱡᱤᱛᱠᱟᱹᱨ ᱾

ᱧᱮᱞ ᱛᱟᱵᱩᱱ ᱯᱮ ᱺ “ᱜᱷᱟᱨ ᱣᱟᱯᱟᱥᱤ” ᱛᱟᱞᱟᱛᱮ ᱵᱟᱝᱞᱟ ᱫᱤᱥᱚᱢᱨᱮ ᱫᱷᱚᱨᱚᱢ ᱤᱫᱤ ᱠᱟᱛᱮ ᱜᱟᱞᱚᱪ ᱟᱠᱷᱲᱟ

ᱞᱟ.ᱭ ᱜᱟᱱᱚᱜ ᱟ ᱯᱩᱸᱛᱷᱤ ᱫᱚ ᱠᱟᱱᱟ ᱢᱤᱫ ᱯᱟ.ᱨᱥᱤᱭᱟᱜ, ᱡᱟᱸᱛᱤᱭᱟ.ᱜ ᱩᱯᱨᱩᱢ , ᱱᱟᱜᱟᱢ ᱨᱮᱭᱟᱜ ᱫᱩᱞᱤᱞ ᱾ ᱤᱱᱟ.ᱛᱮ ᱯᱩᱸᱛᱷᱤ ᱯᱟᱲᱦᱟᱣ ᱠᱚ ᱞᱟ.ᱜᱤᱫ ᱞᱟᱭᱵᱨᱮᱨᱤ ᱥᱮ ᱯᱩᱸᱛᱷᱤ ᱜᱟᱫᱟᱱ ᱫᱚ ᱫᱷᱚᱨᱚᱢ ᱜᱟᱲ ᱞᱮᱠᱟ ᱢᱟ.ᱱ ᱟᱱᱟ ᱾ ᱤᱱᱟ.ᱛᱮ ᱵᱟᱝᱞᱟ ᱫᱤᱥᱚᱢ ᱨᱮ ᱥᱟ.ᱨᱤ ᱥᱟᱨᱱᱟ ᱜᱟᱶᱛᱟ ᱫᱟᱨᱟᱭ ᱛᱮ ᱦᱟᱛᱟᱣ ᱟᱠᱟᱱ ᱠᱟ.ᱢᱤ ᱠᱟ.ᱨᱫᱷᱟ.ᱱᱤ ᱫᱚ ᱟ.ᱰᱤ ᱥᱟᱨᱦᱟᱣ ᱟᱱ ᱾ ᱵᱟᱝᱞᱟ ᱫᱤᱥᱚᱢ ᱨᱮᱱ ᱢᱟ.ᱱ ᱟᱞᱵᱮᱛᱩᱥ ᱴᱩᱰᱩ ᱜᱚᱢᱠᱮᱭᱟᱜ ᱢᱮᱢᱮᱱ ᱞᱮᱠᱟᱛᱮᱼ “ᱱᱤᱛ ᱚᱠᱛᱚ ᱟᱞᱮ ᱠᱚᱛᱮᱜᱮ ᱠᱟ.ᱣᱰᱤ ᱡᱩᱲᱩ ᱨᱮᱱᱟᱜ ᱠᱩᱨᱩᱢᱩᱴᱩᱭ ᱫᱟᱞᱮ ᱾ ᱠᱚᱨᱳᱱᱟ ᱦᱚᱛᱮᱡᱛᱮ ᱟ.ᱰᱤ ᱟᱢᱫᱟ ᱟᱱᱟᱴ ᱢᱮᱱᱟᱜ ᱟ, ᱮᱱᱛᱮ ᱨᱮᱦᱚᱸ ᱢᱤᱫ ᱥᱮᱨᱢᱟ ᱛᱮ ᱞᱟᱭᱵᱨᱮᱨᱤ ᱵᱮᱨᱮᱫ ᱨᱟᱠᱟᱵ ᱨᱮᱱᱟᱜ ᱠᱩᱨᱩᱢᱩᱴᱩᱭᱟᱞᱮ ᱾” ᱴᱩᱰᱩ ᱜᱚᱢᱠᱮᱭᱟᱜ ᱟᱨ ᱦᱚᱸ ᱢᱮᱢᱮᱱ – ” ᱵᱟᱞᱮ ᱪᱟᱱᱟᱪ ᱠᱷᱚᱱᱟᱜ ᱥᱟᱱᱛᱟᱲᱤ , ᱤᱝᱞᱤᱥ, ᱵᱟᱝᱞᱟ ᱛᱮ ᱯᱩᱸᱛᱷᱤ ᱜᱚᱲᱚ ᱨᱮᱱᱟᱜ ᱠᱩᱨᱩᱢᱩᱴᱩᱭᱟᱞᱮ ; ᱡᱚᱛᱚ ᱜᱤᱫᱽᱨᱟ. ᱯᱩᱸᱛᱷᱤ, ᱠᱷᱟᱛᱟ ᱮᱢᱟᱠᱚ ᱨᱮᱱᱟᱜ ᱨᱤᱠᱟ. ᱦᱩᱭᱩᱜ ᱟ ᱾ ᱵᱟᱞᱮ ᱩᱢᱮᱨ ᱠᱷᱚᱱ ᱜᱮ ᱡᱩᱫᱤ ᱢᱤᱫ ᱯᱟ.ᱴᱷᱣᱟ. ᱥᱟᱱᱛᱟᱲᱤ, ᱵᱟᱝᱞᱟ, ᱤᱝᱞᱤᱥ ᱛᱮ ᱥᱮᱬᱟ ᱟᱭ ᱮᱱᱮ ᱠᱷᱟᱱ ᱟᱜᱟᱢ ᱫᱤᱱ ᱨᱮ ᱪᱮᱛᱟᱱ ᱥᱮᱪᱮᱫ ᱥᱮᱫ ᱩᱱᱤ ᱫᱚ ᱟᱨ ᱦᱚᱸ ᱥᱮᱬᱟ ᱪᱟᱞᱟᱜ ᱟᱭ ᱾ ᱥᱟᱶᱛᱮ ᱡᱟᱸᱛᱤ ᱪᱮᱛᱟᱣᱱᱟ ᱦᱚᱸ ᱫᱚᱦᱚ ᱤᱫᱤᱭᱟ ᱾” ᱥᱟᱱᱛᱟᱲᱤ ᱛᱮ ᱫᱷᱚᱨᱚᱢ, ᱱᱟᱜᱟᱢ, ᱥᱟᱶᱦᱮᱫ, ᱞᱟᱠᱪᱟᱨ ᱪᱮᱛᱟᱱ ᱯᱩᱸᱛᱷᱤ ᱠᱚ ᱦᱚᱸ ᱛᱟᱸᱦᱮᱱᱟ ᱾ ᱪᱟᱞᱟᱣᱮᱱ ᱒᱙ ᱢᱟ.ᱦᱤᱛ ᱧᱩᱦᱩᱢ ᱢᱟᱦᱟ ᱦᱤᱞᱳᱜ ᱟᱜ ᱱᱚᱣᱟ ᱯᱩᱸᱛᱷᱤ ᱜᱟᱫᱟᱱ ᱵᱮᱨᱮᱫ ᱵᱟᱠᱷᱨᱟ ᱜᱟᱯᱟᱞᱢᱟᱨᱟᱣ ᱨᱮ ᱥᱮᱴᱮᱨ ᱠᱚ ᱛᱟᱸᱦᱮ ᱠᱟᱱᱟ ᱥᱟ.ᱨᱤ ᱥᱟᱨᱱᱟ ᱜᱟᱶᱛᱟ ᱨᱤᱱ ᱢᱟ.ᱱ ᱪᱩᱱᱱᱩ ᱴᱩᱰᱩ, ᱱᱚᱨᱮᱥ ᱦᱮᱢᱵᱽᱨᱚᱢ, ᱨᱚᱢᱮᱥ ᱦᱟᱸᱥᱫᱟ , ᱥᱩᱱᱤᱞ ᱦᱟᱸᱥᱫᱟ, ᱩᱠᱤᱞ ᱦᱮᱢᱵᱽᱨᱚᱢ, ᱥᱟᱜᱚᱨ ᱴᱩᱵᱩ, ᱥᱟᱵᱤᱱᱟ ᱦᱮᱢᱵᱽᱨᱚᱢ ᱟᱨ ᱦᱚᱸ ᱥᱟᱶᱛᱮᱱ ᱥᱚᱦᱮᱫ ᱠᱚ ᱾

ᱧᱮᱞ ᱛᱟᱵᱩᱱ ᱯᱮ ᱺ ᱫᱤᱱᱟᱡᱽᱯᱩᱨ ᱨᱮ ᱥᱟᱱᱛᱟᱲᱤ ᱣᱠᱤᱯᱤᱰᱤᱭᱟ ᱨᱮᱭᱟᱜ ᱫᱚᱥᱟᱨ ᱥᱮᱨᱢᱟ ᱠᱤᱭᱟ. ᱢᱟᱱᱟᱣ

ᱠᱤᱪᱷᱩ ᱫᱤᱱ ᱞᱟᱦᱟ ᱦᱚᱸ ᱛᱨᱤᱯᱩᱨᱟ ᱯᱚᱱᱚᱛ ᱠᱷᱚᱱ ᱯᱩᱸᱛᱷᱤ ᱜᱟᱫᱟᱱ ᱵᱮᱱᱟᱣ ᱨᱮᱱᱟᱜ ᱠᱩᱨᱩᱢᱩᱴᱩ ᱦᱩᱭ ᱞᱮᱱᱟ‌ ᱾ ᱡᱷᱟᱲᱠᱷᱚᱸᱰ ᱵᱤᱦᱟᱨ, ᱵᱮᱸᱜᱚᱞ, ᱳᱲᱤᱥᱟ ᱥᱟᱱᱛᱟᱲᱤ ᱚᱛᱱᱚᱜ ᱥᱟᱸᱪᱟᱨᱦᱮᱸ ᱠᱷᱚᱱ ᱵᱟᱦᱮᱨ ᱨᱮ ᱥᱟᱱᱛᱟᱲᱤ ᱯᱩᱸᱛᱷᱤ, ᱯᱟ.ᱨᱥᱤ ᱫᱩᱞᱟ.ᱲ ᱫᱚ ᱧᱮᱞᱚᱜ ᱠᱟᱱᱟ ᱞᱮᱛᱟᱲ ᱜᱮ᱾ ᱡᱩᱣᱟ.ᱱ ᱠᱚ ᱠᱚ ᱞᱟᱦᱟ ᱦᱤᱡᱩᱜ ᱠᱟᱱᱟ ᱟᱯᱱᱟᱨᱟᱜ ᱯᱟ.ᱨᱥᱤ ᱪᱤᱠᱤ ᱞᱟᱦᱟ ᱤᱫᱤ ᱞᱟ.ᱜᱤᱫ ᱾ ᱥᱟᱱᱛᱟᱲᱤ ᱩᱭᱠᱤᱯᱤᱰᱤᱭᱟ ᱨᱮ ᱠᱟ.ᱢᱤ ᱠᱟᱱᱟ ᱠᱚ ᱡᱮᱜᱮᱛᱤᱭᱟ. ᱜᱟᱫᱮᱞ ᱠᱷᱮᱨᱣᱟᱲ ᱦᱚᱯᱚᱱ ᱾ ᱱᱟᱣᱟ ᱵᱮᱨ ᱨᱟᱠᱟᱵ ᱫᱚ ᱟᱨ ᱦᱚᱸ ᱫᱟᱨᱟᱭ ᱨᱩᱣᱟ.ᱲᱚᱜ ᱠᱟᱱᱟ ᱾

ᱧᱮᱞ ᱛᱟᱵᱩᱱ ᱯᱮ ᱺ ᱰᱷᱟᱠᱟ ᱤᱱᱴᱟᱨᱱᱮᱥᱱᱟᱞ ᱭᱩᱛᱷ ᱯᱷᱤᱞᱢ ᱯᱷᱮᱥᱴᱤᱵᱷᱮᱞ ᱨᱮ ᱥᱚᱸᱫᱷᱟᱭᱱᱤᱭᱟᱜ ᱥᱚᱨᱮᱥ ᱥᱠᱨᱤᱯᱴ ᱥᱤᱨᱯᱷᱟ.

ᱚᱞ ᱜᱚᱲᱚ ᱺ ᱥᱟᱶᱛᱟᱞᱤ ᱵᱷᱟᱥᱟ ᱥᱟᱦᱤᱛᱛᱮᱨ ᱤᱛᱤᱦᱟᱥ- ᱫᱷᱤᱨᱮᱱᱫᱨᱚ ᱱᱟᱛᱷ ᱵᱟᱥᱠᱮ; ᱥᱟᱶᱛᱟᱞᱤ ᱥᱟᱦᱤᱛᱛᱮᱨ ᱤᱛᱤᱦᱟᱥ- ᱯᱚᱨᱤᱢᱚᱞ ᱦᱮᱢᱵᱽᱨᱚᱢ


ᱥᱮᱭᱟᱨ ᱛᱟᱵᱳᱱ ᱯᱮ
x